芋圓圓

營業中

休息中

呢間糖水舖出晒名超級好食，所以夜晚去到，見到一大條長龍喺度等緊入座，所以最後決定咗買外賣去搵個位食。佢有好多唔同嘅芋圓糖水俾你揀，我最咪揀咗紫米露 三色芋圓，先講芋圓，三色芋圓即係有黃心番薯、芋頭同埋紫心番薯！！我覺得三隻都超級好味，雖然我係一個唔食芋頭嘅人，但係佢嘅芋圓真係好好食！！三種都好香，一直落去你會知道佢係邊一種，唔似其他鋪頭有時啲芋圓食完都唔知佢係咩味， 三種都非常之香濃！質地方面咬落佢哋都好有咬口，唔會過分烹調左，亦都唔會似有啲鋪頭咁有啲番薯根喺入面。初頭我以為會分唔到芋頭味同埋紫心番薯味，因為兩種都係紫色，但原來紫心番薯會深紫色，一睇就會知道！ ！熱紫米露都唔差，佢有超多紫米放咗落去，一啲都唔孤寒。所以而家一諗到食糖水就諗起呢一間鋪頭，大家多多支持呢一類有誠意有心機去做甜品嘅鋪頭！