芝味鳥 (上徑口村)

營業中

休息中

肚餓到出汁， 電視又做緊節目喺度炸雞，絕對抗拒大財團嘅乾爭爭炸雞，所以立即就搵網上外賣平台 外賣，搵到呢間成日見佢架電單車仔嘅芝味鳥。二十分鐘就送到，本身都非常雀躍，分分下啲嘢食餐具先發現，咦個Pizza呢？立即打去追番啦，咁又要等二十分鐘啦，呢個時候我哋就先開餐。中國人同西人一樣，飲啖湯先。嘩，呢啖湯真係不得了，水嗲嗲，飲到薯仔未，不過成口都係粒粒嘅粉狀，咁你明啦，不過冇所謂嘅，但味道都實在難以接受，味又淡到不行，奶溝水咁，但奶溝水都應該好飲過佢。再食啖咖喱雞飯呢？喂？咖哩呢？算，我當你gravy sauce 咁食？我錯，都係唔得。咁不如就咁推開啲汁，食雞粒同底下嘅飯呢？我可以好肯定咁講白飯係成盒最好食嘅，啲雞粒嘅肉腥味真係...嘩。雞呢？有個鳥字響招牌度應該唔差掛？第一口係好脆，小小油，雞肉都多汁嫩滑。第二口啲皮自動分開哂，油溢味再勁咗，雞肉越接近骨位越有血腥味。三件雞，實質我哋食到嘅部分可能只有一件。十分鐘唔夠已經處理晒以上嘅食物， 大部份都應該係掉咗。燒烤雞肉風味嘅Pizza，厚批有一個缺點就係吸左濕氣會變得煙韌，不過味道還好，但我嘅胃口已經徹底被撲熄了。