聚來車仔麵

營業中

休息中

深水埗有幾間車仔麵都好出名，呢間聚來車仔麵亦漸漸為人認識，而佢最出名嘅並唔係車仔麵。雖然重點推介嘅唔係車仔麵，但都要點返碗醫肚兼過吓口癮。難得佢嘅蕃薯粉唔使加錢，當然係叫蕃薯粉($10)做麵底，配料就揀咗上湯花膠($13)、魚片頭($10)、墨魚丸($9)同紅腸($9)。車仔麵屬正常水平，上湯花膠清得嚟夠入味，我就幾鍾意。蒜泥白肉分量超多，而且鋪滿蒜粒，非常香口惹味。其實呢度必食嘅係佢哋嘅招牌鮮煎餃子，餃子屬自家製，分別有韭菜餃、椰菜餃同芝士粟米餃，而且可以雙拼。椰菜餃入面除咗有椰菜同豬肉，仲有木耳絲，椰菜配豬肉味道鮮甜，而且煎得香脆，非常美味。芝士粟米餃就最啱小朋友食，濃濃嘅芝士再配上煎得香脆嘅餃子皮，感覺有點似食緊pizza。而另一個最值得慕名而來嘅，就係佢嘅爆漿阿華田西多士。西多士本身可以選擇榛子醬或花生醬，個人認為榛子醬配阿華田味道更夾。西多士中間挖空，灑上阿華田粉至完全覆蓋整件西多士，然後再注入佢哋特別調配嘅醬汁，大概係雲呢拿煉奶嘅味道，切開就有如岩漿流出，每口多士都沾有醬汁，真係好味到要舔碟。