影片
更多
2019-01-28
1760 瀏覽
喺荃灣呢啲舊區，想搵間高級啲嘅酒樓飲餐茶，只有兩間酒店可以選擇。今次試吓熊貓酒店嘅「殷悅」，雖然係米之蓮咁又點啫 (冇星㗎，只係推介咋)，但見佢嘅食評都係好壞參半，不過，都係抱住試吓嘅心態，希望同舊朋友一聚可以食好少少，坐得舒服啲傾吓計。早幾日已經訂咗位12點，訂位時已經被告知到時都要稍等一陣先可以攞位，結果等咗20分鐘，1220才安排入座。等候區有梳化，梳化都算幾舒服，側邊有落地大玻璃都幾開陽，但舊區景冇乜睇頭，但睇吓啲landscape 其實又有另一種韻味 (安慰下自己)。睇食評一路都話啲點心好貴好貴，坐低即刻睇點心紙，有哂價錢好清楚，明碼實價。其實價錢當然係貴啲，但都可以接受嘅。因為自己本身喺中上環返工，普通酒樓都唔平，啲價錢一早已經習慣晒，呢度話晒掛名都係酒店中餐廳，唔通收你普通商場酒樓價錢咩？不過，乜都係假，最緊要都係睇返啲點心好唔好食，同埋服務如何。基本上，嚟之前都有做下功課，啲人話好食嘅點心都會叫嚟試吓！「芝士三文魚撻」喺其他酒樓未見過，好好味，三文魚同芝士好夾，非常足料！但賣相就真係麻麻地，我建議佢應該好似做到芝士撻面咁樣就Perfect啦！「杞子玉帶燒賣」都係非常足料
早幾日已經訂咗位12點，訂位時已經被告知到時都要稍等一陣先可以攞位，結果等咗20分鐘，1220才安排入座。等候區有梳化，梳化都算幾舒服，側邊有落地大玻璃都幾開陽，但舊區景冇乜睇頭，但睇吓啲landscape 其實又有另一種韻味 (安慰下自己)。
睇食評一路都話啲點心好貴好貴，坐低即刻睇點心紙，有哂價錢好清楚，明碼實價。其實價錢當然係貴啲，但都可以接受嘅。因為自己本身喺中上環返工，普通酒樓都唔平，啲價錢一早已經習慣晒，呢度話晒掛名都係酒店中餐廳，唔通收你普通商場酒樓價錢咩？不過，乜都係假，最緊要都係睇返啲點心好唔好食，同埋服務如何。
基本上，嚟之前都有做下功課，啲人話好食嘅點心都會叫嚟試吓！「芝士三文魚撻」喺其他酒樓未見過，好好味，三文魚同芝士好夾，非常足料！但賣相就真係麻麻地，我建議佢應該好似做到芝士撻面咁樣就Perfect啦！
「杞子玉帶燒賣」都係非常足料，塞到爆哂！帶子雖然只有薄片，但燒賣肥豬肉唔多，包住一隻完整嘅蝦，蝦肉非常爽口！
「菊花海鮮餃」賣相唔錯，頂端收口用咗幾片小黃菊嘅花瓣點綴，但千祈唔好期望有啲乜嘢菊花嘅清香，只係純粹裝飾啫。而餡料亦係非常充足，充滿蝦仁及少許切碎嘅帶子片粒，可惜調味比較重手，第一啖咬落去，已經覺得味精嘅味道好突出，要扣分！
「蒜心蝦春卷」唔使講又係充滿蝦肉，但切粒嘅蒜心先係驚喜，蒜心獨有嘅香味喺春卷裏面同蝦肉夾到不得了！完全係神奇嘅化學作用！
「懷舊灌湯餃」就令我感到有啲失望，作為一個灌湯餃控，對於「懷舊」兩個字好有期望，結果懷舊不成，只係用灌湯餃皮做嘅上湯鮮蝦水餃 ... 根本唔係傳統懷舊嘅灌湯餃。
「煎釀三寶」可以話用大堆頭來形容，當然又係蝦啦，釀滿脹卜卜嘅蝦膠，好爆，好爽口彈牙！不過，與其叫佢做煎釀三寶，其實應該係「炸」釀三寶先啱，炸得油光閃令令。
另外，不得不提就係佢哋熊貓造型嘅招牌奶皇包，不過現場啱啱蒸好出嚟，場面都幾嚇人，眼同鼻會因為包皮預熱膨脹而爆烈咗出嚟。所以影相就要等一等，收縮返就會冇事。
講返味道，奶皇餡奶味太重，但吉士味唔夠濃，而且又唔夠甜，所以唔係太好食。
但點都好，最難食嘅就係馬拉糕，散修修，又鞋口。其實馬拉糕真係一間酒樓最基本嘅糕點，都做唔好，點攞米之蓮推介呀！？
至於叉燒包、鮮竹卷就正正常常，冇乜特別。
最後食埋個甜品芒果布甸，除咗有非常多芒果肉粒喺裏面之外，都係冇乜特別。
而最特別相信係個茶壺啦，真係唔知點解要用咁嘅設計，唔可以話個手柄攞嘅時候唔方便，但亦唔見得好方便，但個人覺得都幾醜樣，品味嘅嘢我真係識條鐵。
最後嘅總結係，如果單純用點心嘅質素同味道來評定是否值得攞米之蓮推介，我就覺得去唔到呢個水平囉，但佢充滿蝦、蝦、蝦，同埋蝦嘅點心，其實都做得唔錯，但點都好，就係未達到甚至突出到一個米之蓮推介水平。
張貼
