麻辣派對 (瑞生酒店) (已結業)

上個星期突然間好想食辣嘢，就第一次去咗尖沙咀加連威老道間麻辣派對。餐廳位置就係尖沙咀the one附近，都好方便。因為餐廳係要搭𨋢，地下個服務員都好好禮貌招呼我哋搭𨋢。上到去見到成間餐廳佈置真係好有party嘅感覺，同埋一坐低已經聞到好大陣麻辣味。我同朋友兩個人都比咗張四人枱我哋，好闊落。前菜同小食方面我哋兩個人叫咗個毛肚（即係牛栢葉）同埋一個七味雞軟骨。戀味毛肚唔會太辣啱啱好，食落好惹味同爽口，唔會一味得個辣字。七味雞軟骨就炸得好香口，面頭仲有啲炸蒜，夾埋七味粉食都不錯。重點主菜我同朋友今次試咗酸菜魚，搵咗餐廳侍應介紹叫邊隻魚好，佢哋都好細心介紹邊隻魚食落嫩滑啲少骨啲，最後揀咗桂花魚。上到枱見到魚嘅份量都唔少，同介紹嘅一樣桂花魚相對滑好多同無咁多骨，個湯酸度剛好唔會太鹹或太酸。本身個酸菜魚就包咗啲粉，我哋就另外加咗萵荀同埋炸頭腐角，粉煙煙韌韌仲好入味，萵荀爽甜同個酸菜湯都夾。食到咁上下兩個人叫咗杯水果茶，水果好足料同大塊，有西瓜、火龍果、橙仲有啲奇亞籽，不過個水果茶就略嫌唔係好夠甜，但總括嚟講都不錯。