麻辣派對 (瑞生酒店) (已結業)

秋風起，最啱食啲辣野驅下寒意。知道尖沙咀呢度食辣野幾出名，就預早BOOK枱免去排隊嘅時間。呢度嘅麻辣食品五花百門，水煮魚／酸菜魚／酸辣鍋應有盡有。實有一款啱胃口。因為第一次食，點咗個入門級ＢＢ辣酸菜魚。配上江團魚及水晶粉。酸菜湯底：酸／香／麻／辣，恰到好處，唔會因為過辣而搶去酸菜嘅惹味。每片魚肉都好大一塊，加上大量酸菜及／泡椒／辣椒乾及蒟蒻，整鍋味道豐富，令人食指大動。最份量絕對夠食。江團魚肉幼嫩滑，入味之餘再配上些許麻辣提鮮，十分惹味。除咗魚肉，水晶粉亦都係重點，滑溜溜嘅口感吸滿晒酸辣湯汁，配埋一齊食真係無得彈。酸菜魚之餘，小菜水準都有返咁上下。因為見隔離枱點咗魚香茄子，我地都點返個黎伴水晶粉食。茄子入味得黎唔油膩，麻辣中仲食到一梳梳茄子肉，用黎配飯真係一流。但因為盤酸菜魚份量真係好多，食完兩款菜式已經好飽了。唯有下次再黎挑戰香氣四溢嘅明爐水煮魚啦。最後埋單時，侍應姐姐送上兩碗清一紅豆沙，真係神來之筆，將整晚嘅肥膩感，辣味一掃而空。總結黎講，味道／份量／價錢都值回票價，ＧＯＯＤ！