好蔡館

營業中

休息中

同舊同事食飯，四條佬，有咩好得過食潮州打冷。舊老細表示睇中間潮州菜館，當然順佢意，拿拿臨打去book枱。點知菜館老闆話分兩場，一係6:30pm一係8:30pm，咁巴閉，一於book個6:30pm睇下係咪真係咁多人食。遲左少少到，好彩有舊同事已經準時攞左枱。舖頭細細，目測都有八成滿，果然有料到。菜館老闆喺我地點菜時已經推介左幾碟撚手小菜俾我地，既然大家懶得諗，一於黎個潮式omakase。先黎每人一盅胡椒豬肚湯，胡椒味夠香而唔會太辣，豬肚亦好爽口，唔錯。煎蠔餅係潮州菜館必備菜色，呢度嘅蠔餅亦整得唔錯，大大隻蠔放入口。沙嗲牛肉炒芥蘭，味道ok。蒸花蛤雖然細細隻冇乜肉，但見到師傅排得整整齊齊咁上碟，值得加分。蒸立魚同清水鴨就稍為失色，特別係清水鴨略為過咸。另外四個人share一碗蜆肉撈飯，加少少紫菜湯一齊食，又幾清甜。甜品叫左兩碗芋泥同兩碗綠豆爽，芋泥有驚喜，綠豆爽就不過不失啦。食完，果然要準時交枱，因為下一枱客已經恭候中。四條麻甩佬，潮州打冷，吹下水，咁就最開心。