銓仔記

營業中

休息中

天色陰暗，又開始凍返，即刻想打邊爐暖暖身。係屋企附近四圍行吓發現大埔墟呢一間任食雞煲好似好香好吸引，百幾蚊一位好抵食，就行咗入去同女朋友開餐。我哋叫咗大辣至尊麻辣雞煲，兩個人有半隻。一上枱，比想像中多雞件！同單點鋪頭嘅一隻雞有得比！女朋友最鍾意食嘅紫洋蔥都夠多，正。呢度嘅大辣，麻比辣多，做惹味又唔會食得辛苦，估計係用麻椒粉去炒，所以味道夠之餘又唔會食到一粒粒麻椒。食完雞煲都飽咗一半，睇吓剩低嘅香料，以任食來講食到咁嘅質素嘅雞煲實在冇得頂！之後就加湯打邊爐，每一款配菜都可以逐件叫，方便就返自己份量，唔係廚房根據人數執俾你，每款可以試少少幾好。肥牛等質素正常。韭菜餃以為係來貨上枱仲係結左冰，但食落相當有驚喜，餡有多種打碎嘅配料，好似媽媽自家製水餃咁，好多汁！另外估唔到嘅就係有自家炸響鈴，又香又脆，任食少見！飲品方面選擇都唔少，啤酒都有四個唔同嘅品牌。總括嚟講呢間任食雞煲性價比相當高，見隔離枱加錢叫美國安格斯肥牛都好靚仔，下次多啲人嚟一齊試吓先。