平昌 (已結業)

樂富竟然開咗韓燒店放題呀! 點可以唔去試下?收工唔知食咩好，諗起開咗間韓燒店，就決定過嚟試吓。上網睇過，第一間店舖係喺旺角，分店就喺樂富呢度開咗。環境裝修都好韓風，裝修係近年大熱嘅電影或者電視劇嘅人物卡通版。我覺得最值得讚嘅係呢度嘅通風系統真係做得好好，每一檯都會有一個吸風管，就算我食完兩個鐘，身上一啲味都冇，有鼻敏感嘅朋友都冇打個乞嗤(我呢位朋友係只要喺空氣唔流通嘅地方，就一定會鼻敏感)。呢度落單係用白板筆係板上寫低編號，就會按人頭數量出返相應嘅份量。唔會浪費紙張，又唔會叫你成日食食吓嘢要撳電話。一坐低已經即刻上咗泡菜，生菜芽菜，同埋落咗蛋漿。叫咗個大君套餐 $228（未加一） 兩小時任食嗌咗個最平嘅套餐，但唔好睇小佢，都好多嘢食，八款牛肉，三款雞，九款豬，四款肉類，六款海鮮，六款蔬菜，十五款料理，有大概10幾款嘢飲任飲。性價比好高，物超所值。海鮮方面嗌咗海蝦同埋扇貝，好新鮮，隻蝦好爽口，唔會晦，扇貝都好甜。八款牛肉我哋都叫晒，朋友最鍾意食牛肋骨肉，牛舌。我就最鍾意食肥牛片，烤牛肉。每一款牛都醃咗好入味，就算有時燒耐咗都唔會嚡熠熠。另外，冇諗過連雞翼都好出色，午餐肉係厚切嘅，好滿足。