厚福館 (南角道) (已結業)

前晚一家四口去九龍城打邊爐，屋企人話成日食方榮記，想試新野，靈機一觸諗起呢間厚福館，一於去試。去到門口，舖頭面積唔大。入到去伙計即刻安排入座，未坐定已經俾晒menu同埋推介佢地的特色食品。不過個menu竟然無列價錢。湯底就叫左番茄牛尾拼杞子豬骨，送料叫左肥牛，肥牛粒，墨魚滑，蝦丸拼豬肉丸，福州魚丸，象拔蚌，魚麵，黑豬肉及羊肉。肥牛賣相好靚，食味一流，既鮮味又滑口。肥牛粒好有質感，灼耐左都唔會鞋。墨魚滑好似鯪魚肉，入口都頗滑。蝦丸及豬肉丸係自家打的，真係非常爽口鮮味。而黑豬肉及羊肉都唔錯。最後就係魚麵，一個唧袋裝住然後唧落湯，又好食又好玩。最後埋單要七百九十咁滯，雖然貴左d，但係味道好及服務殷勤，都係值得一去的。