時新快餐店 (已結業)

作為一位真‧香港人，如果你未食過時新漢堡包，真係值得慚愧！時新漢堡包係屬於香港人既味道，又平又好味，雖然餐廳地方勁淺窄，非常唔好坐，但大家仍然唔介意買外賣企響門口食，亦唔會會介意門口既長龍，會乖乖咁排隊。而我，久唔久都會心思思想黎食，今日都唔例外。一如既往，門口都係排住長龍，無緊要，我目標明確：漢堡芝士蛋包！排隊去！等左大約10分鐘，漢堡新鮮熱辣做起。一打開，原來塊牛肉都幾細，但勝在夠厚身，唔會話咬落去無餡。漢堡係用新鮮牛肉打出黎，鬆軟有肉汁，而且仲有好多洋葱粒，好香好好味！畫龍點睛既仲有個沙律汁，酸酸甜甜，開胃又惹味，熱辣辣，真係寫住稿諗起都想食！最重要係，咁高質素既漢堡包，售價係超廉宜，只係20皮！果然係香港人既好朋友，學生哥既美味飯堂，好快又要黎下一次啦。