麻辣派對 (金百利廣場) (已結業)

夏天冇乜胃口，同朋友出街咁啱想食辣野，上網見到呢間好似好多人推薦，所以去試吓。餐牌勁多唔同選擇，有雞、魚、海鮮，仲要有唔同系列。歌樂山辣子雞 加茄子 蒙古羊肉雖然都預咗好大碟，但係一見到都嚇親！真係好大碟辣子雞。兩個人去食唔晒。叫咗BB辣，見到有咁多辣椒嚇親，但食落又真係唔太辣，辣子雞炸過好香口，仲有好多花生好入味，好岩配啤酒。十分推薦羊肉！少少羶味好好食！茄子炒埋落去好入味，好彩跟咗店員嘅建議加左配菜。麻辣小面第一次食小麵，食落去口感好滑，仲吸左啲湯，麻麻地好入味。仲有花生榨菜肉碎喺上面，幾好味。金牌酸辣水晶粉水晶粉好煙韌，同樣係好大碗，雖然都係BB辣但係比麻辣小麵冇咁辣。凍蜜語水果茶杯嘢飲好多生果，加埋個茶底，凍凍地好解辣。