GRIND SIZE

營業中

休息中

身邊個個都話走，真係唔捨得，今日又同個朋友餞行，約咗喺一間打卡Cafe GRIND SIZE見個面兼留個紀念。日式蟹膏·三文魚籽·帶子·明太子手捲粉，聽個名都知吸引。手捲粉係人手製造，所以每條大小不一，麵質比較彈牙，我幾鍾意佢嘅口感。帶子兩邊煎得咁香，而入面就仍能保持鮮嫩。三文魚籽同蟹膏喺手捲粉之上，相映成趣，同時亦為整碟手捲粉帶來更多鮮味。炸青衣魚柳薯條配自家製他他醬有大大件魚柳再配海量嘅薯條，真係好抵食。薯條新鮮炸起，每條都外脆內軟，唔需要點茄汁都咁好食。青衣魚柳炸粉唔算太厚，而入面嘅魚柳就非常嫩滑又夠Juicy，連埋他他醬一齊食就更加惹味。午餐跟餐加$30就可以配飲品，所以我都揀咗一杯咖啡。Rose Latte嘅奶泡同咖啡係分開上，可以自己再倒入杯內。奶泡裏面已經有微微嘅玫瑰香，再加埋上面嘅玫瑰花瓣，玫瑰香味就更加撲鼻。倒入咖啡後就成為一杯精緻嘅Rose Latte。甜品之中名字最特別嘅就係不是飲品·凍檸茶，原來係檸檬味sorbet配以伯爵茶味嘅心太軟。心太軟嘅熔岩就更加充滿濃濃嘅伯爵茶香，甜甜嘅蛋糕配以酸酸嘅雪葩，真係一個非常好嘅配搭。