安平燒肉

營業中

休息中

同閨蜜慶生，佢話想食燒肉，我就介紹佢嚟認識吓安平燒肉。呢間台灣引入嘅燒肉店，除咗有日式燒肉嘅特色之外，食材亦加入咗好多台式嘅元素，所以我覺得比起一般傳統日式燒肉店嘅味道更加豐富。朋友生日唔可以失禮，當然要揀個最貴嘅餐，乜都有齊任你點，最緊要係吃到飽！每次我都最鍾意佢哋嘅雪櫃，飲品常滿而且排列整齊，我呢個強迫症每次見到真係好治癒，自我陶醉過後當然要攞返支佢哋自家製嘅桂花烏龍。除咗燒肉，自助區仲有好多蔬菜類可以作燒烤用，翠玉瓜同燒菠蘿就係必食之選。呢度仲有櫻花蝦拌飯，牆上有說明教你建議食法，然後多少隨意任你自己調配。食燒肉第一件事當然係燒牛肉啦，我呢個餐可以叫盡所有唔同質素嘅牛肉，總括而言，我覺得澳洲M5和牛同安格斯牛小排係最好食。除咗食材豐富之外，呢個餐仲會包括每人兩條嚴選牛舌芯，閨蜜本身唔食牛舌，但經我勸諫之下佢試咗一啖之後都話好食到不得了。除咗牛肉，仲有一系列海鮮同小食，我就特別推介烤豬肉乾同雞泡魚乾，佐酒一流。除咗燒烤用嘅食材之外，仲有一系列可以即食嘅台灣夜市小吃，我就最鍾意梅山酥炸薯同澎湖花枝排。最後每人仲有一份甜品，可以揀哈根達斯雪糕，而我就比較鍾意台中仙草凍，充滿台式風味。