君蘭冰室

營業中

休息中

最近我同媽咪，囡囡去完朗豪坊買野，就去咗君蘭冰室食下午茶，環境舒服，裝修又新，行完坐下抖抖。佢哋嘅下午茶有粉麵亦有飽點小食類。我就揀左沙爹牛肉炒河粉同蛋撻。河粉嘅沙爹醬味道濃郁，比起港式豉油口味更濃郁。河粉滑順，炒得夠火喉夠香口，牛肉嫩滑份量又多，搭配埋一杯奶茶，好味！牛油曲奇皮蛋撻夠晒蛋香，焗得岩岩好，入面嫩嫩滑溜，撻底好香牛油味，酥脆好食!媽咪就食黑松露炒蛋厚多士配炸雞翼，再加個星星撻。厚多士外脆內軟，黑松露嘅香氣同埋炒蛋嘅滑口，非常之夾，黑松露份量好多，食落真係好香又滑lulu。炸雞翼嘅外皮金黃酥脆，入面嘅肉嫩嫩，邪惡好味。星星撻真係非常好味，大大件餡料滿滿，嫩嫩香甜，批底真係非常脆香。囡囡就食仿鮑魚絲火腿通粉，呢個佢最愛嘅冰室菜式🤣！通粉煮得剛好，唔會淋晒，仿鮑魚絲搭配火腿係經典搭配，佢仲盛讚呢到嘅仿鮑魚絲係切條，唔係一片片，岩晒佢而家甩牙都食到😅😅😅。除咗經典冰室菜式，君蘭冰室仲有兩餸飯同三餸飯選擇，望落都好吸引，見人買走，大大盒，價錢都唔貴。佢地嘅包點都相當吸引，新式創意同傳統口味都有。