九運來粉麵世家

見到咁多人俾好評，做完運動唔知食咩嘅時候，諗住就試吓呢一間粉麵店。但係一試就激嬲咗我。一入去已經冇人招呼，自己搵位坐。之後叫我前面嗰位姐姐落單，佢隔咗一陣先轉身過嚟幫我寫嘢。咁我就同佢講想要個魚蛋米走青、飲凍檸水少冰少甜，跟住我就問佢有咩菜（因為有油菜送）。咁佢就答我：菜心通菜生菜。咁我就話我要通菜，另外加多個小食麻辣魷魚鬚。之後佢就問返我，你魚蛋河粉呀可？我就話米粉呀。之後佢就問我係咪要生菜？我話咪講咗通菜囉。跟住佢就重複講一次話你要魚蛋河同埋通菜。我就同佢講話米粉呀。跟住佢就話哦～米粉。跟住佢再問我飲咩。我就問佢：其實我頭先講嘅嘢點解你可以全部都唔記得？佢就冇乜禮貌答我話：咁你咪再講囉！之後我話我講幾多次你都唔記得。我話你可唔可以記吓客人要啲乜？之後佢就係咁叫我再講！我話我要小食麻辣魷魚鬚。之後佢就問我咁你要飲乜？佢話你答咗飲乜先。之後我就着火了。佢都係冇記過我叫嗰啲。我望住廚房整緊嘢食嘅哥哥仔好無奈（因為佢都奇怪點解我哋開始嗌交）我就話你個同事而家搞乜？點解我講嘅嘢佢全部都冇聽到？要重新問過我一次又一次？可唔可以搵其他同事過嚟？跟住哥哥仔就即刻叫另外個姐姐過嚟。之後幫我落單嗰個姐姐就發脾氣話咁你咪叫佢幫你落嘢飲囉。但係之後嚟嗰個姐姐又唔過嚟問我飲咩喎！我就越諗越嬲，我就問返第一個姐姐話咁你而家幫唔幫我落埋嘢飲呀？之後佢話咁你飲乜呀？我話凍檸水少冰少甜。最後嚟個杯都係甜到爆。我已經唔想再出聲講。臨到最尾差唔多食完嘢聽到哥哥仔話7號枱埋單俾返九折佢（即係我張枱），我都冇理到佢。我心諗而家唔係平啲俾我就可以，係我覺得你哋呢度啲姐姐做嘢好有問題。知道其實一間粉麵店唔可以有啲咩期望，但係連最基本落單3，4樣嘢你一樣都唔記得，我覺得係有啲過分，同埋態度係差同唔覺得自己有問題。我諗我應該唔會再返去呢個地方食，寧願去返潮興魚蛋食，啲員工醒好多