好似好耐冇食過泰國菜咁
好鬼掛住 次次見到其他人食
隔住Mon都流晒口水🤤
呢間平日夜晚都好爆 就知唔錯
超好彩咁啱仲有兩個位 唔駛等
環境屬於文青打卡風
但要打卡就要揀人少啲嘅時候去啦😝
小食拼盤 $99 🙆🏿♀️
2件蝦餅、2件春卷、4件泰國雞棗
雖然蝦餅得半邊 但係冇揸流攤
超紮實 咬落去亦都好彈牙 加埋鮮蝦味
無得頂 好想encore😋
春卷幾特別 入邊全部都係蔬菜
外面脆卜卜 入邊軟淋淋 口感幾好
又可以減低罪惡咁😆
其實本應未聽過雞棗係咩 但大約都估到
包左類似腐皮卷嘅皮 咬落去啖啖肉
都係好好味🤤
1
青咖哩牛腩 $96 🙆🏿♀️佢嘅咖哩係比較浠嗰款 但個味都幾出
青咖哩配咗啲椰汁 我覺得完全唔辣
食唔得辣嘅都可以試
主角牛腩都唔少 而且煮到超淋
啲肉亦好嫩 仲要有啲有少少肥膏
半肥瘦永遠都係邪惡又好味😀
而且我哋幾欣賞佢又蘿蔔又瓜又豆又西蘭花又椰菜花🥦
好均衡飲食 完全唔使補多碟菜都ok
菠蘿炒飯 $96 🙆🏿♀️
泰國菜最經典嘅炒飯🍍
上到枱香噴噴 大大碟 連啲蝦都大大隻🦐
仲有大量肉鬆同腰果做配搭
大人細路都絕對啱👨👩👧👦
一開始個碗淨咗啲咖哩汁 我哋撈嚟食
食到最尾反而略鹹
之後就咁食 不得不讚佢粒粒金黃色嘅飯充滿黃薑味💛
食到一半 仲可以咬片青瓜解解膩
椰汁芒果糯米飯 $55 🙆🏿♀️
最後其實好飽 但都唔放過芒果糯米飯
因為真係想食好耐啦！！！
青綠色嘅糯米飯球 配上半個芒果🥭
椰汁自己落 多與少 悉隨尊便 又香又黏又甜
搵呢個做埋尾真係冇得輸
完全冇後悔叫咗 即刻止到吓癮🥹
西柚梳打 $28 🙆🏿♀️
大推！
首先大杯 夠凍 造型好睇
除咗最上面嗰一嚿西柚之外
最最最欣賞佢入邊都有唔少西柚肉
完全融入梳打度 正😍
#5 Pink Guava Special 粉紅番石榴特飲 $58 🙆🏿♀️
純粹覺得用番石榴做飲品比較少見就叫咗
而且叫咗冇酒精嘅 飲落都唔錯
攪勻佢飲甜甜地 亦都好解渴
因為太耐冇食 結果叫得太狼死
我哋兩個女仔要捧住個肚先行到
呢餐嘅份量 我哋覺得夠3-4個女仔食🤣
加分欄
⭕️ 主動斟水
⭕️ 提供口罩膠袋
⭕️ 份量十足
✅ 加一服務費
