西貢松記車仔麵

營業中

休息中

冇嚟松記食車仔麵冇八年都有七年，咁啱入嚟西貢心郁郁就走去食！叫咗個盛惠$75嘅百寶車仔麵，再加咗個$38嘅咖喱魷魚，以為執到寶！點知咖喱同魷魚之間好陌生，佢哋溝通唔到，咖喱黐唔到上魷魚，食落咖喱醬還咖喱醬，魷魚掛唔到汁，完全冇味！唔緊要，我仲有碗八寶車仔麵頂住，成碗嘢顏色豐富，滷水湯充滿八角嘅味道，甚至乎有個阿叔行過都聞到，仲話呢檔嘢啲牛腩好香好好味！等我仲鬼死咁開心，滿懷歡喜食落去，點知啲食物淨係有顏色，冇味道！咖喱魚蛋除咗顏色之外，冇咖喱味冇魚味，滷水雞翼滷得好靚，但係食落去淡如水！紅腸豬皮，正常交易未能扭轉劣勢…我以前真係好鍾意食呢間嘢，打死都冇諗過會落到今日咁嘅田地，比貴啲錢食一碗車仔麵，只要好食係唔會有問題，但係今日喺松記食嘅呢碗完全令我覺得成名係會令到質素降低，好希望下次我再入西貢，見返松記你，你會俾到我以前同你邂逅嘅感覺！加油！