炑八韓烤 (瓊華中心) (已結業)

老死生日，一向都知佢無肉不歡，適逢大家好耐冇食過韓燒，於是就上網搵到呢間炑八。一去到已經好多人喺嗰度等位，好彩一早訂左位，如果唔係真係唔知要等幾多個先有得食。一坐底班友仔已經打開menu點牛，見到佢有幾個都特別推介，就諗都唔洗諗揀左牛肋骨、牛舌同特級牛肉眼。同埋有印象有好多人喺openrice激讚佢個厚切五花腩，梗係要叫埋啦正所謂「酒池肉林」吖嘛，有肉梗係要叫啤酒啦，之後就叫多三枝HITE大啤飲，正！推介嘅牛肋骨同五花腩真係名不虛傳，牛肋骨肉好軟身，「骨肉分離」，又唔怕痴牙。而五花腩肥瘦分明，而且唔會太肥又唔會太瘦，既有咬口之餘又有嗰種入口即溶嘅脂肪香，真係諗返起都流口水。牛舌同牛肉眼都係水準之上，肉嘅質素明顯地比街外燒肉店高，加上冰凍嘅啤酒，簡直係一大享受。店員亦都好細心同我地講，等我地飲完一枝先，其餘幫我地雪住，keep住夠凍。不得不提就係佢個前菜，雖然係簡簡單單兩塊洋蔥，但係佢醃得相當惹味，令人食慾大振