CHIMAC (大埔超級城) (已結業)

今日收工返屋企途中屋企人叫我做外賣仔買埋外賣比佢地，佢哋話想食韓國嘢，咁我就揀咗呢間韓式炸雞店試試。呢個韓式炸雞店喺大埔、沙田、科學園、觀塘、中環、九龍灣都有分店，今次就嚟咗位於大埔超級城嘅分店。餐廳面積唔算太大不過都設有堂食位置，而且仲提供洗手機方便顧客食雞。揀咗韓式炸雞套餐，套餐提供六款不同口味供選擇，跟餐仲有炸薯條同酸蘿蔔小食，而且炸雞仲可以選擇雞腿肉或者有骨炸雞，另外餐牌仲有二人餐同四人套餐選擇。韓式魚糕串 ($12/串) : 想食啲韓國特色小食，所以叫咗兩串食吓，魚糕串非常入味，唔使配任何醬都好好食。炸雞揀咗蜂蜜焦糖口味，味道甜甜地之餘炸得夠脆口，揀咗無骨雞腿肉，食落啖啖肉超級正。韓式泡菜蛋蓋炒飯 ($50) : 炒飯嘅份量唔少，滑蛋下面每粒飯都沾滿了醬汁，旁邊仲有蔬菜同泡菜做伴碟，味道辣辣地非常惹味。粒粒蜜桃汁超級好飲，而且仲有果肉食到，重點推介飲品。