漢年茶餐廳

營業中

休息中

昨晚無聊入去大圍搵嘢食，七點左右發現好多舖頭都似準備閂門冇乜客。七點廿五分經過漢年，睇見好多人，決定入去試試。入到去，阿姐望吓我，好啦做埋你啦，快啲叫食乜，七點半閂門嘞。咁我坐底想話睇吓餐牌，阿姐已經又問我食乜，我亂望牆上，見黑椒雞扒，就隨口話黑椒雞扒，阿姐話豬扒啦，豬扒有嘢飲添，咁就豬扒啦。叫完，隔離搭枱人兄碟炒米粉上枱，嘩香到飛起，想改，但見佢哋忙於執嘢收舖，算了。到碟豬扒飯上枱，一睇就知正，首先個汁夠熱夠黑椒味，飯熱又係我鐘意嘅淋夠索汁，豬扒唔係一塊扁個種，係連骨帶肥，好滑但又新鮮炸完有啲脆。好耐未食過咁正嘅豬扒，多謝阿姐介紹我叫豬扒。仲有杯凍奶茶，好滑，夠奶味。食飯其間，不停有人入嚟，阿姐話閂門嘞，咁外賣呢，冇嘞，閂門嘞。可知這店在區內應好有份量。我再入大圍，一定再去。