農耕記 湖南土菜 (黃大仙中心北館)

營業中

休息中

💛農耕記 湖南土菜 (黃大仙中心北館) (黃大仙)黃大仙龍翔道136號黃大仙中心北館1樓N133-N134號舖今日嚟到黃大仙龍翔中心既農耕記湖南土菜食晚飯，餐廳整體嘅裝修都好有特色，外面有好多農作物，應該係想表達佢哋嘅菜式都係一啲土菜，農村菜式。我哋第一道菜係招牌蝴蝶魚，我哋只係叫咗小辣，味道都唔錯，香味四溢，辣得好開胃，而且佢嘅口感似係平時我哋食嘅鯇魚，但係更加爽口更加彈牙。第二道菜係青椒土雞蛋，亦都係一道十分之道地嘅土菜，因為青椒同雞蛋都係農村隨處可以搵到嘅食材，佢哋炒得好有火候，上菜之後都keep住仲有煙，味道冇想像中咁濃。之後係小筍炒臘肉，三道菜之中我最鍾意呢一道，因為真係好有農村感覺，平時好少食咁有農村風味嘅菜式。加上我好鍾意食筍，而且臘肉都唔會話好鹹，仲有陣陣嘅煙熏味道，所以我最鍾意呢一道餸。最後叫咗一個鹹蛋黃燒賣，不過唔好俾佢個名呃咗，唔似我哋香港平時食嘅魚肉燒，佢入邊係糯米飯同埋鹹蛋黃，不過味道都唔錯嘅。整體我都好喜歡呢度嘅菜式，因為佢哋嘅土菜都好有鑊氣，調味都好惹味，反而冇我想像之中咁濃烈。