宮崎肉本舖 (已結業)

Weekday可以放一個悠長嘅lunch，夾埋三五知己同事，嚟食個商務午餐。lunch嚟講呢度唔使特別排隊 當然價錢就會貴一截。入到來景色好靚，成個落地窗眺望維園，綠油油嘅風景好正。雖然天色唔算好好，如果好天嘅話，嚟呢度食飯應該係一件更加賞心樂事。座位已經放好圍裙，仲有一碟醬料。和牛燒肉set好靚，前菜係肉碎辣豆腐，中間仲有幾片青瓜解膩，味噌湯同埋茶碗蒸質素屬中上。牛肉就唔使多講，和牛雪花嘅分布均勻，每一舊都入口即溶。雖然價錢係貴啲，但係肉嘅quality夠。肉嘅部位有好多款，有平時食開嘅牛肩肉，後腿肉，五花腩，另外仲有一啲時令嘅蔬菜。朋友叫咗個唔係燒肉嘅餐：係和牛拉麵。啲牛肉多到成座山咁，肉質好軟諗，跟餐配嘅餃子餡都係牛肉。揀咗黑松露味，煎得好香脆，一口爆汁，同以往食開嘅日式餃子，感覺大相逕庭。食到後期，感受到呢間肉嘅份量真係好多。以一個午餐來講，好滿足，簡直就係食肉獸嘅天堂。最後用清爽嘅柚子雪葩作結。如果下次老細請食飯，都要帶佢嚟呢度鑿佢一筆。哈哈哈！