麻辣派對 (金百利廣場) (已結業)

嚟到銅鑼灣，見到金百利商場有大大隻字寫住麻辣派對，嗰度嘅食物好好食，有著名嘅酸菜魚，麻辣嘅家常菜，好有對味蕾嘅衝擊！所以今晚決定同朋友再挑戰一下。嗰度地方好大，唔使排隊，就入到去，入邊嘅佈置好有感覺，侍應好快就安排到我哋去坐一個闊落嘅位置。餐牌有好多選擇，我哋點咗一個麻婆豆腐，咕嚕肉，同埋四季扁豆，全部菜式，都可以選擇辣味。有BB辣，中辣，或者大辣，適合唔同嘅人士🤩😍 咕嚕肉好有鑊氣，酸酸甜甜，好好食。仲有完全唔起眼嘅麻婆豆腐都令我哋有驚喜，麻婆豆腐唔似出邊嗰啲餐廳一攤水，配白飯一流。食到辣辣地，仲叫咗個水果茶飲添！好解渴，又大杯！下次一定要你試埋佢其他食品，因為見好多人都有嗌酸菜魚同埋水煮魚！🤤🤤🤤