米真鮮

營業中

休息中

之前係灣仔諗住食，點知人都比較多，所以冇食到，難得今次喺旺角行街見到佢開咗新鋪，所以入咗去試吓。應該係店主嘅一個男人好熱情咁樣招呼我哋。餐牌亦都簡單易明，我哋嗌咗個招牌豬八戒小窩米線雞骨湯同埋一個招牌牛魔王小窩米線酸辣金湯。仲有幾份小食，因為佢小食可以半份咁樣叫，所以我哋可以食多幾樣，惹味卜卜脆其實係豆腐卜，麻辣海蜇雲耳拍青瓜，麻辣豬耳沙律同埋尖椒滑嘟嘟皮蛋。豬八戒嗰雞骨湯飲落好清好鮮甜，啲豬雜好新鮮冇異味，一啖豬什一啖清雞湯配搭得都幾好唔錯，啲湯飲完唔覺得頸渴。牛魔王係酸辣金湯，但係我就覺得唔辣，所以店員拎咗地獄辣粉俾我加上去，好彩都係試一試，少少辣粉就已經好夠味辣得都好過癮，據說係用咗三種辣椒去配製而成嘅，所以食得辣嘅人可以加多啲落去，配料亦都好新鮮，特別係美國肥牛唔會過熟啱啱好。佢嘅米線好似同其他地方嘅有啲唔同，比較偏粗少少，同埋軟硬適中唔會好淋有咬口。至於其他四份小食每一樣都醃得好入味，尖椒皮蛋係最有驚喜嘅，脆卜卜亦都係好有口感有驚喜，其他兩款可能平時食得多所以冇驚喜，但總括嚟講兩份米線+四樣嘅小食真係唔差，下次可以再食過，最緊要嘅係佢可以免費追加米線。