地點：銅鑼灣登龍街
菜式：粵菜
餐牌：頭盤，燒味，小菜，飯麵類，甜品等等。
一坐低就已經有前菜兩碟，分別係香辣蒜蓉雲耳仔同酸堯頭，好開胃。每小碟$18。茶位每位$20。
鐵板西班牙豚肉叉燒 $288 另加一
鐵板西班牙豚肉叉燒果然係鐵板上枱，服務員臨上枱之前先淋上醬汁，即刻聽到吱吱聲。叉燒一客10件，大大件，份量多！伴有鷹嘴豆同少少枝豆。叉燒瘦中帶肥，好淋，夠厚切又有質感，味道甜甜地，好味。
紅燒潮州翅 $298 另加一
紅燒潮州翅係用燭台暖住上枱，寫明有兩両翅，果然好多，個翅好滑溜，另上新鮮芫荽同黑醋比你自己調味。
羊肚菌松茸竹笙花菇菜膽燉湯 $98 另加一
燉湯個湯好清，聞到同飲到非常香菇味，入面真材實料，有羊肚菌、松茸、竹笙、花菇同菜膽，健康養身之選。
紅燒乳鴿 $68 另加一
呢個紅燒乳鴿做緊會員特價。一隻乳鴿一開四，果然係辣嘴，食落皮脆肉嫰好多肉汁，食得出好新鮮。伴有車厘茄同花瓣。另上豉油同鹽。
蜜汁銀鱈魚 $256 另加一
蜜汁銀鱈魚一客兩件，炸得非常脆皮，入面魚肉好嫩又多汁，面頭個汁好甜。一樣伴有車厘茄同花瓣。
上湯菜心 $168 另加一
上湯菜心面頭有金華火腿碎，好香。菜心份量好多，好翠綠，又爽脆，個湯好清不過又夠鹹香。健康得黎又好味。
桂花五色糕 $58 另加一
桂花五色糕賣相出色，明顯見到五層，服務員介紹由上至下分別係桂花，木瓜，士多啤梨，芒果同椰汁。食落係清爽而帶多重味道，先有桂花香，然後有芒果同椰汁甜味，而且食到爽脆果肉！
清心丸綠豆爽 $38 另加一
清心丸綠豆爽用有蓋燉盅上枱。入面有好多煙韌好似啫喱粒粒同綠豆粒，味道少少甜甜地，唔過火。
生磨蛋白杏仁茶 $48 另加一
生磨蛋白杏仁茶係招牌，都係用有蓋燉盅上枱。杏仁茶香滑味道唔假，而好多滑溜厚身蛋白係底，好足料。
餐廳裝修高檔，面對開揚景致用餐份外舒適。
