力寶軒

營業中

休息中

今日中午準備出去食飯，個天黑晒又超大雨。 近近地行去金鐘廊附近睇吓有咩食。全部餐廳都好多人，同事建議去力寶軒飲茶。力寶軒本身係一間潮州菜館，我哋就叫咗幾個點心，加一份滷水鵝肝。一間好嘅潮州菜館，就一定要試吓滷水菜式。呢度嘅滷水鵝肝好嫩滑，唔係出邊餐廳嘅粉肝，滷水味唔會死鹹。點心我哋叫咗蝦餃皇、燒賣、蘿蔔糕、小籠包同翡翠帶子餃。蝦餃皇一籠有四大粒，粒粒都好飽滿，蝦肉彈牙，每件入邊有超過一隻大蝦。 小籠包皮薄湯汁多，肉餡有少少肥，但配上黑醋中和油膩，味道剛剛好。翡翠帶子餃賣相幾好，帶子鮮甜，重大粒過入面嘅蝦肉。最後叫咗個芒果布甸做甜品，芒果肉好多，加埋花奶係絕配。依家中午有個龍蝦伊麵加一款小菜，好抵食，兩個人平平哋食呢個套餐都一定夠飽。環境唔錯，又有落地玻璃，所以都好多人幫襯。