龍景軒

營業中

休息中

第一次去四季酒店嘅龍景軒晚膳、好鍾意個環境。我哋一行七人幫襯，佢安排我哋坐喺window side，望住ICC食飯，景色醉人。頭盤食咗乳豬片以及甜豉油鱔，碟鱔好好味，甜甜地，厚肉，邊位香脆，肉好肥美，仲有鱔油香味，必試！個乳豬好失色，乳豬皮脆，但實身，唔夠鬆化，中間夾左塊饅頭質地嘅麵皮，俾你化解油膩，但件麵皮唔香，亦都好薄，有啲「林」，連埋乳豬肉三層一齊食，鬆散，麻麻哋。叫咗個椒鹽田雞脾，超好食，外層炸得香脆，雞肉嫩，肉質有彈性，忍唔住要再叫多一點，推介！片皮鴨都好好食，鴨皮香脆鬆化，但塊麵皮凍咗，少少失色，我哋隻鴨二食，鴨肉用嚟炆伊面，伊面煮得好淋，麻麻哋。另外值得一讚嘅係大千蝦球，蝦肉彈牙，好大隻，肉好厚身，必試炒和牛粒都好食呀，肉嫩，有牛香味！會青椒、菌類一齊炒，惹味好送飯西檸雞味道較淡，但脆皮鬆脆，西檸汁味道清香，不過不失。甜品方面，楊枝甘露令人驚艷，用芒果布甸墊底，上邊淋左香濃香芒楊枝甘露汁，清甜不膩，印象難忘！奶黃酥個皮都酥香鬆化，好味😋其他甜品普普通通，可以唔試。