名煌金閣

營業中

休息中

一直都知道長沙灣呢邊有好多好嘢食，仲有好多選擇，今次經過元州街見到一間新開嘅中菜館，望入去環境好好，有種高級感，於是帶阿媽入去試下。環境裝修得好好，大枱有，亦有好多獨立卡位，無論三五知己定係一大班人嚟聚餐都好合適。《麻辣手撕雞半隻》$148分量超多，手撕雞辣度一般，但係好夠香，而且無乾柴的感覺，好好味。除咗雞肉之外，仲有大量嘅青瓜、扎肉，好滿足！《果仁黑椒牛仔粒》$148首先黑椒嘅味道唔算好重，果仁方面份量都好多，但係建議可以爆炒一下，如果唔係食落個味道就會比較寡啲。不過牛仔粒好軟林，又夠味，整體來講都幾抵食。《原籠荷香金銀蒸龍躉球糯米飯》$178估唔到呢個季節都有糯米飯食，糯米飯同埋龍躉球表面有大量嘅蒜蓉，加重左飯的香味，配埋龍躉一齊食真係一流，龍躉球厚又滑，冇魚腥味，好正。《生磨杏仁茶》$28杏仁味道唔會太重，對我來講啱啱好，值得欣賞的是杏仁茶裡食到蛋白，提升口感，整體亦都唔會好甜，老人家都啱食。 總括嚟講，雖然呢度嘅食物價錢唔平，但係份量好多，而且環境好好，想聚餐嘅話都係一個唔錯嘅選擇。