可可豬椰香海南雞專門店

營業中

休息中

紅磡同土瓜灣多好嘢食一向都眾所周知，今日同男朋友經過土瓜灣，因為工作忙碌關係，都冇得坐喺度好好食晚餐，見到呢間海南雞專門店，就二話不說買咗個外賣。佢哋呢度唔算好多飯類選擇，都係海南雞同埋豬手嘅配搭。所以我哋就叫咗椰香海南雞飯同埋招牌豬手飯，加多個青木瓜大蝦沙律。招牌豬手飯，豬手唔會好肥，份量亦都多，口感不錯，味道偏淡一啲，但咁樣反而可以食到材料嘅原味。椰汁海南雞飯，原來佢個椰汁係用嚟煮個雞油飯，超香椰汁味，淡淡都咁正，真係淨係食飯都得。而佢啲海南雞，份量同樣好多，而且肉質幾嫩滑，絕對唔會係over cooked嗰啲海南雞，真心好食。青木瓜大蝦沙律，啲蝦好新鮮鮮甜，絕對冇腥味，而青木瓜同其他配料都係非常新鮮，食落好清爽，拎黎當小食都得，而且非常健康。兩個飯加埋沙律，同埋兩杯嘢飲，埋單先128蚊，絕對極高性價比，而且飯餸嘅份量都好多，平價優質醫肚首選。