麻辣派對 (金百利廣場) (已結業)

麻辣小隊出動既機會難逢，絕對唔可以揀遷就香港人口味既辣野，今次偷聽到由店員到客人都講緊國語，不禁期待辣到噴火既一刻。重慶銅盆烤桂魚 ($298) 麻辣研究左好耐要重慶銅盆烤桂魚定水煮系列好，見有人話後者魚片份量唔多，就揀左呢款。 原條片開既桂魚預先炸過再放入麻辣湯，有油炸過既酥脆同油香，就咁食都已經夠香口惹味。 幾欣賞選用左有咁上下重秤既桂花魚，魚肉厚身又嫩滑，一人半條岩岩好，連骨都食埋。 罕有地挑戰中辣，最後都係我眼中只係熱浪等級，輕鬆駕馭得黎幾夠香，越食會越辣。配料除左有大量芽菜，仲有豆腐、金針菇、魔芋同萵筍，如果萵筍可以唔煮咁耐爽身少少就更佳。 加左水晶粉 ($28)，份量十足，索哂麻辣汁好入味，但質地偏軟腍唔太過癮。蜜語水果茶 ($38)無限西瓜、火龍果、橙同奇亞籽既陣容令我未飲都已經滿心歡喜，水果茶唔會太甜夠冰凍，啖啖雜果好滿足。主打既辣度最後未達致驚為天人，反而用料毫不手軟又幾抵讚，唔追求地道重慶水平都可以一試。