麻辣派對 (瑞生酒店) (已結業)

疫情開始放緩！我們一行四人在尖沙咀揾嘢食，朋友見到間叫麻辣派對，話好想食！咁就二話不說就上去食啦！餐廳設計都幾美觀，坐位尚算舒適寬敞，枱面放有支水加上檸檬及薄荷葉任飲，配合食辣嘢都幾細心！餐廳食物分大、中、小及BB辣，我哋二人食得辣，另二人就一般，咁就決定食小辣。先叫招牌菜酸菜魚片，有分多種魚類，我自私推介覺得桂花魚係最好味，点知餐廳話賣晒，要改食整條老檀酸菜魚，味道有少少辣，加入咸酸菜非常入味，桂花魚嫩滑鮮甜，仲加上好多配菜，例如金菇，萵筍，魔芋，豆腐及芽菜，我哋仲加埋豬紅，成窩口感好豐富，非常好食。辣子雞就唔少得，麻辣味十足，雞肉嫩滑有雞味，唔錯。跟住點咗幾個小食，七味雞脆骨，自己加上七味粉，香脆惹味。鮮椒爽脆生腸係我至愛，爽口彈牙又唔會有壓味。戀味毛肚即係麻辣牛柏葉，真心覺得餐廳小食都整得好好味。朋友覺得好似撑少少，我哋就叫多碗酸辣水晶粉。食埋就差不多啦！最後餐廳還送上桂花冰粉糖水真窩心！這餐飯每人都係用咗二百多元！有超值的感覺；值得下次約朋友來再食！