湘聚小廚

營業中

休息中

其實我好鍾意食辣，今日我朋友帶咗我去香港大學站附近，原來有一間隱世小店都可以食一啲湘菜為主嘅食物。一入到去店內，好多都係用木板同埋木枱嘅設計，令人感到古色古香好似去咗內地傳統嘅一啲餐廳。梗係要試吓呢度嘅辣野啦，先點左個酸菜魚，清炒萵筍絲同埋一個雙椒蒸茄條。佢啲嘢食未黎之前，侍應俾咗個前菜我哋食，有泡椒蘿蔔同炸花生。呢啲都係飲甜嘅小食唔會收錢架。炸花生斷脆但感覺不熱氣，而且好香口。而泡椒蘿蔔就好酸，可以開一開胃。清炒萵筍絲到咗，成個碟都好熱，一條條萵筍望落去晶凝通透，好吸引。食落去有爽口嘅感覺，唔會太硬，佢冇落好多調味料去煮感覺真的很清新。能夠清洗口內的其他味道，實屬不錯。個酸菜魚好快亦都到咗，見到佢好似一個湯碗咁大！裏面嘅魚塊就比較多骨，要小心少少食，不過成個湯撈埋白飯就Perfect！成個湯飯咁，好暖胃，慢慢慢慢食就好快食晒啦。最後嚟嘅蒸茄子係我最喜愛嘅！呢度嘅煮法同其他店舖好唔同，茄子變到好細條，上面有綠色同埋紅色嘅辣椒一齊用黎蒸，感覺上更加入味，而且富有濃郁的蒜頭和豉油的味道。最後叫咗個龜苓膏，細細盎，下一下火，為今晚畫上完美句號。