笑口祖

營業中

休息中

一對好有心嘅夫婦，因為覺得退休對佢哋太唔適合，所以個女打本比佢哋搞一間自己嘅食肆，老闆娘話佢先生本身喺酒樓做大廚，所以已經有好多年嘅大廚經驗，大廚出身嘅先生，加上呢位背後女人助力，開業至今做到停唔到手，好多時候一早已經賣晒佢哋嘅招牌乳鴿。點解會知道佢哋嘅故仔？呢對夫婦之前接受報紙訪問，喺佢個舖頭都有張貼分享出嚟。我幫襯嗰日啱啱有另外一個女孩子話喺報紙度睇到佢哋嘅報道，專程去買佢哋嘅斑蘭糕，仲叫夫婦倆繼續加油。而我就專程去幫襯佢哋嘅招牌乳鴿飯，同埋手撕雞飯準備聽日食，另外啲炸豆腐真係超正，有原味同芝士味，外脆內軟口感啱啱好，彈牙芝麻卷同香脆炸鮮奶唔係太甜，健康又好食，老闆娘話每日要準備最受歡迎嘅招牌班蘭糕都要花上三個鐘頭。老闆娘非常友善健談，見到冇乜客戶嘅時候，過嚟同我傾偈，所以知道佢哋咁多故仔，超水準嘅乳鴿仲係平民街坊價錢，一隻乳鴿只係為$36，我諗都幾難搵到呢個質素嘅乳鴿係咁平。大家去深水埗大力推薦呢家店幫襯，一定唔會令大家失望。