燒肉 JuJu

營業中

休息中

天氣轉冷想食啲熱辣辣嘅嘢，燒肉就最好不過，但係今日唔想食得太Heavy，呢間一人燒肉嘅套餐份量就啱啱好。套餐入邊包括咗沙律或者泡菜，湯，肉，飯同埋一罐飲品。和牛壽喜燒（A4和牛赤身120g）$108食完個青瓜絲蟹柳沙律就開始燒肉。A4和牛赤身賣相好靚，肉色好靚，油脂分布雲石紋均勻。燒三四下就好快熟，啲肉汁標晒出嚟。燒好之後蘸上蛋汁，然後再沾上壽喜燒汁，就可以食得。牛肉入口油脂四溢，軟滑非常，蛋汁令牛肉好香滑，壽喜燒汁甜甜地，好好味。套餐本身包嘅係白飯，我哋加咗$18有紫菜同雞蛋，紫菜加香濃雞蛋撈飯真係超正。個湯有麵豉湯或者粟米湯揀，依個餐揀咗粟米湯，粟米湯都幾真材實料，係粟米打成蓉，都幾香滑。壺漬蒜香豬腩條配明太子烏冬$178呢個餐同樣有沙律飲品，如果湯我哋就揀咗麵豉湯。豬腩肉長長一條，將腩肉剪開一塊塊燒，燒得金黃香脆，入面保持肉汁，加上香蒜入味，好滋味。呢個餐係跟烏冬，明太子份量超多，加上木魚絲，紫菜絲同埋雞蛋拌勻一齊食，冇得輸。味道大，少少香辣，口感又Creamy，烏冬煙靭。第一次嚟呢間一人燒肉店食，體驗不錯，可以下次再來。