走過十萬八千里找到你

營業中

休息中

某日同事負責買外賣返嚟，大家都讚嘆邊間咁好食，佢話間餐廳叫做走過十萬八千里找到你，大家都笑點解個名咁瓊瑤，不過因為真係太好食，今日我就訂咗外賣放工過嚟攞。原來呢度其實係一間好打卡able嘅Cafe，之前仲榮獲新假期嘅推介餐廳。作為一間cafe，意粉、小食、甜品當然一應俱全。屋企大人細路都鍾意食carbonara，所以我當然揀咗卡邦尼扁意粉配溫泉蛋。佢嘅carbonara勁多煙肉，仲灑上芝士，混合埋溫泉蛋嘅蛋汁，令整個意粉更香更滑。仲有呢個上次同事買過返嚟嘅明太子岩鹽燒蟹棒貓耳朵，佢嘅明太子醬就真係非常惹味，再加上燒過嘅蟹棒同三文魚籽，更加鮮味無窮，我尤其鍾意貓耳朵嘅形狀，可以完美地兜住意粉醬汁，一啲都唔浪費，食起上嚟更滋味。呢個黑松露薯條配黑松露醬真係超香黑松露味，而且個精粹其實係喺個黑松露醬入面，啖啖充滿黑松露香。聽講呢度嘅甜品都好正，可惜外賣就只能夠揀一啲方便帶走嘅甜品，於是我就揀咗芝士餅，經典原味日式芝士蛋糕就最能食出芝士餅嘅水準，佢嘅芝士餅厚實而細滑，又唔會太溜。而宇治抹茶芝士蛋糕就多一點點抹茶嘅茶香，味道亦唔錯。佢哋嘅花果茶亦都好受歡迎，簡單一個茶包已經可以沖出美味嘅花果茶。