叉燒大王

營業中

休息中

同一大班朋友來呢度開飯，由於上次已經食過叉燒，所以今次同埋班朋友諗住叫第二啲餸啦。今次大家決定叫半隻頭抽雞，賣相唔錯，因為色澤立立令加上頭抽嘅顏色，一食落就知道唔係用冰鮮雞，肉質夠彈牙仲夠滑，而且用過頭抽來浸嘅味道係唔同嘅，豉油味令人一定要食雞皮，唔識食就真係浪費，隻雞本身帶少量脂肪，所以食起上嚟更加滑啦。第二樣係蒜蓉粉絲蒸貴妃蚌，將粉絲同蒜蓉鋪滿晒係貴妃蚌上面，貴妃蚌嘅下面就係蒸海鮮嘅豉油同埋鮮味嘅汁，淋返上面頭就最啱啦。粉絲吸收左蚌汁，所以食落真係好鮮甜，另外貴妃蚌肉質夠滑，除本身夠新鮮之外，用來控制蒸煮嘅時間都好重要，一人一隻好快食晒，真係好想食多隻。另一樣上碟嘅係蒸白鱔，賣相已經夠靚仔，白鱔切成一嚿嚿，食落就知原來相當肥美，但係又唔會覺得食到濟，因為用咗杞子來蒸，所以令味道相對較為淡，可以食多幾舊，唔同平時用豉汁黎蒸，豉汁相對較重口味，係一疊好適合秋天嘅餸。最後仲有一個豆腐海鮮煲，呢個天氣食都幾啱，因為個溫度可以keep住，豆腐將海鮮味吸晒入去，所以零舍多汁又夠滑，海鮮例如蝦同埋魷魚都好入味，加埋係煲底嘅白菜仔，將上面嘅餸吸收晒啲精華，所以連白菜仔都好入味。