忠記粥品 (啟業商場)

營業中

休息中

呢日接近黃昏5點，覆診完，再嚟呢間粥店食嘢。由於早已計劃幫襯，所以午餐只係食咗10粒雞肉燒賣，呢次嚟到，當然要食上次話會食嘅炒麵，另外叫咗碗豬雜粥，睇吓有乜東東。炒麵好快到，同上次評論一樣，係無乜油，所以食落口唔夠滑，食炒麵，我喜歡落甜醬、辣醬、少少麻醬，再灑上芝麻，咁先至叫好味。呢度嘅炒麵明顯係預先炒好，所以唔係好夠熱，而且只得芽菜炒，若果加上韮菜及甘筍絲去炒的話，無論賣相及口感都會更好，而我亦起粉嶺聯和墟食過有店舖係用芽菜、韮菜、甘筍絲去即炒。慶幸呢間舖嘅炒麵質地算煙韌，而且麵條粗幼正常，算係合格啦。至於豬雜碗粥，啲料都幾多，有粉腸、豬腰、豬肚、豬膶及豬心，樣樣都好食，尤其是豬心，一片片，做得好滑，我要好仔細食，先至確定佢係豬心，但我真係唔知佢同及第粥嘅分別，最衰上次無記錄低及第粥入面有啲乜，唔得！我下次嚟要叫及第粥，mark低有啲乜餡至得。