Greyhound Café (太古城中心)

營業中

休息中

聖誕節將至，好多餐廳都出咗限定menu。發現到呢間泰菜餐廳都有個2人套餐，可選和牛或龍蝦，就一去試試究竟。價錢$628兩位都唔會太進取，節日去食都唔錯啊！套餐包晒小食、餐湯、兩主食同埋甜品，都幾豐富！小食揀咗佢地嘅招牌脆炸單骨雞翼，之前每次嚟都會食，今次係set item都唔可以錯過呢！雞翼好脆，單骨處理咗食落更方便。鮮蝦冬陰功意大利雲吞每人一碗冬陰功湯，好濃郁帶酸辣味嘅冬陰功，湯內有兩粒彈牙鮮蝦，意大利雲吞內餡包嘅都係蝦仁，整體充滿鮮味。要一讚意大利雲吞嘅皮相當薄同滑。帶子蘆筍香草寬麵醬汁係青醬嘅味道，寬麵有嚼勁如果再煮耐少少就好，帶子仲保持到鮮嫩，蘆筍存在感唔算高。雖然醬汁比較濃稠同掛麵，但因為青醬比較fresh所以都唔會太漏。黃咖喱原隻龍蝦到主角出場，龍蝦好似浸浴咁浸於黃咖喱之中，龍蝦肉拆好晒即刻食得啖啖肉，未算好彈牙但龍蝦味都出。黃咖喱好濃味，而佢嘅出現當然要伴隨薄餅啦，我地加點咗個薄餅蘸咖喱，好滿足！甜品-椰子味千層蛋糕Cream幾輕盈椰子味幾重，椰肉位有少少甜，而面頭撒上白朱古力碎好加分。