Pizza Piazza (已結業)

平時好少會去荔枝角，難得今日去荔枝角同vender開會就順便食埋午餐，揀咗間門面別致嘅西餐。見到有手打意大利麵都好想試，可惜手打意大利麵冇得跟餐，為咗優惠價食到tiramisu同士多啤梨拿鐵最後都係揀咗lunch set。Lunch set餐湯係洋蔥湯，洋蔥同磨菇味都好濃。主菜我揀咗黑松露大蝦粗意粉，整體賣相唔錯，有四隻大大隻嘅大蝦，隨意粉仲附送一塊Pizza滿足埋我想食Pizza嘅願望。Pizza属煙韌類型，有蒜頭同香草香味。大蝦啖啖肉，夠爽夠彈牙，冇腥味。意粉軟硬適中，有淡淡黑松露菌香味。我貪得意見枱面配料有樽辣椒粒，於是加啲落意粉度試下，結果出乎意料咁好食，辣椒粒並唔辣嘅（利申：我食十少辣都覺得辣），但加咗辣椒粒之後意粉整體嘅味道提升咗好多，呢個係我嘅開心大發現。士多啤梨拿鐵杯拿鐵同餐牌相一模一樣，係睇樣都覺得好飲嘅類別，事實上都好好飲，有奶味都有濃厚士多啤梨味，酸酸哋唔太甜。呢間餐廳嘅Tiramisu好特別，面頭有一層唔甜嘅奶泡，可以提昇整體嘅奶香味，而餅身係挺身嘅，同一般食開嘅Tiramisu有啲唔同，整體唔太甜。