新華苑酒家

營業中

休息中

蒸鍋同打邊爐相比起嚟，感覺上少咗一份負擔，所以近排都多咗食。今日去咗旺角道嘅呢間新華園，其實即係以前嘅潮福嘅位置，由於而家都一樣係食蒸鍋，所以無乜大改動，呢度地方闊落，樓底有夠高，所以感覺上絶對唔會侷促，卡位，圓枱，包房都有呢度食套餐為主，二三佰元起，價錢中等，套餐已經包括左有海鮮，例如海蝦、聖子、鮑魚等等再加上自選嘅食物，如果想食得精啲嘅朋友，仲有啲新鮮嘅象拔蚌， 龍蝦同桶蠔等等。店員會先上粥底，我哋揀咗南瓜排骨，另外每人仲有半隻乳鴿同埋幾隻蒸大蜆。各款海鮮都係新鮮美味，而且蒸得啱啱好，肉質爽甜，最鍾意係聖子同鮑魚，食完一隻都唔夠喉。另外配料我地點左蟲草花蒸雞，肉質夠滑又入味，呢個推介手打蝦丸同梅菜豬肉丸都好食。另外仲食咗蒸粟米，勝瓜，雜菇同菜等，全部都好鮮甜，食完啲肉再食蔬菜，特別舒服最後個粥底亦都煮好，南瓜夠晒甜，再加上之前蒸嘅海鮮、肉類精華滲晒落去，唔使加任何調味已經好夠味，絕對係精華，每人食兩碗，飽飽！另外一提呢度啤酒、汽水都係任飲，今日自己都破例飲晒成支大啤，鍾意飲啤酒嘅朋友就啱晒啦。