Plato Cafe & Bistro (裕民坊YM²)

今日約左朋友去觀塘食飯，經過裕民坊見到間餐廳好靚、環境舒適就入左去。餐廳安排左我地坐窗邊高枱，方便同朋友傾計。一坐低就睇下食咩好，最後揀左2個dinner set卡邦尼意粉、西班牙海鮮飯，同埋2個頭盤天婦羅魷魚、蒜蓉牛油炒什菌。叫完無耐好快送左個餐湯過黎。今日嘅湯係忌廉甘荀湯。湯唔止幼滑，每一啖都有甘荀蓉，口感十足。飲緊湯無耐，好快就送左天婦羅同炒什菌過黎。先講天婦羅，明顯食得出係新鮮炸起，食落都冇油益味，同埋天婦羅外脆內軟，配埋佢個酸忌廉醬，真係愈食愈停唔到口。至於個炒什菌同樣咁正，食落勁重蒜蓉味，岩哂鍾意食重口味嘅人。雖然用牛油炒但唔覺油膩，食落十分清新。終於到主角出場，先講西班牙海鮮飯，海鮮材料種類非常豐富，鮮味十足，同埋佢個飯底有濃郁嘅蝦湯味，唔會太咸，食落味道岩岩好，值得一試。之後到卡邦尼意粉，醬汁黏稠岩岩好，每啖汁都有煙肉嘅肉香同洋蔥嘅香味，意粉食落有嚼勁，口感十足。餐飲揀左凍朱古力同熱抹茶鮮奶，凍朱古力飲落唔覺有粉味同埋十分香滑，味道亦都有豐富嘅可可味，重有勁邪惡嘅cream，超正。而熱抹茶鮮奶茶香濃郁，口感綿滑，甜度亦適中，值得推介。