聯發茶餐廳

營業中

休息中

今日咁岩去九龍城買火鍋料，就順便去食埋個Brunch。其實有一間我周不時就會去食就係發哥至愛之一的聯發茶餐廳。傳聞聯發本身都係由澳牛班底主理，所以你見門面同Menu都有異曲同工之妙。但我鐘意聯發多過澳牛主要有兩點，第一係雖然兩邊都要排隊，但聯發從來唔會催促叫餐，亦唔會趕走。除非真係好多人排隊，如果唔係假日都可以兩個人就坐四人卡位，食都食得舒服好多。第二就係相對澳牛多選擇，有時想試其他野都有得揀。由於係Brunch，所以揀左特餐同埋西多士。特餐其實同平時茶餐差唔多都係有多士、火腿、炒蛋或煎蛋，不過湯麵就變成沙嗲牛肉湯粉。多士厚身鬆軟，炒蛋用上三種唔同種類的蛋，所以蛋色夠鮮艷而蛋味夠重。同其他茶記唔同，係聯發我通常都會叫意粉，因為佢呢度煮得比較彈牙，唔會過諗。而沙嗲牛用上新鮮牛肉，食得出無雪味又唔會加鬆肉粉而令肉質變得奇怪。另外，沙嗲醬汁顏色夠深，味道夠濃，撈埋意粉同湯底就唔會過鹹。另外西多士都係呢度的Signature，首先係新鮮炸熱辣辣不在話下，其次係超厚切，充滿蛋香，再加塊厚牛油同埋糖漿，真係食極都唔厭。如果大家仲唔夠喉，仲可以加埋雪糕，又有另一番風味。