喜雙逢酒家 (已結業)

附近食肆唔多，呢間叫做中規中矩，所以久唔久都會幫襯吓，希望佢唔會執 🤣🤣🤣是晚都算多人堂食，3 個人叫咗個籠仔蟹蒸糯米飯，估唔到佢最快上檯，而且大大籠，每人食咗 2 碗都仲有半籠打包，味道香口，如果多啲蒜蓉更好，蟹都新鮮有羔，正 👍👍跟住嚟個椒鹽豆腐，正正常常，啱晒送酒。再嚟個煲仔欖角大葱排骨，又係大大煲，好多洋蔥大葱，夠晒香口，最尾都有半煲打包。最後木瓜魚肚煲，原本應該喺隔離揾張檯煲，熟咗先上檯嘅，但呢排人手唔夠，而上餸個亞叔又唔知，就連個爐一齊送咗上嚟！個煲又開始滾啲湯彈晒出嚟，咁好自然我哋就熄火，亞部長不停話未熟，覺得我哋唔想個爐喺檯，所以照攞走個爐放嗰煲木瓜喺度，煲蓋都唔留返比我哋 😭😭😭 咁我哋唯有等個煲湯嘅温度焗熟啲魚肚啦，等咗陣食，個湯都好甜都可以。其實我個手袋放喺嗰煲木瓜對住張櫈度，我係怕啲湯滾到彈啲湯落去啫。 。 。總括嚟講，呢間酒樓大碟夾抵食，味道不過不失，希望佢捱得過個疫情啦！