梁記餃子麵坊 (已結業)

收工返到元朗，諗唔到食咩記近近地喺巴士總站隔離嘅呢間餃子店食下餃子，8點幾都係座無虛席而且要等位。佢店面得一個姐姐，又要落單又要出餐又要收銀，忙到踢晒腳，等左20分鐘終於到我地。因為要等嘅關係所以我地都喺門口揀好晒嘢食，所以一坐低就可以叫嘢，諗住加快進度，但姐姐忙到五分鐘後先得閒理我地。揀嚟揀去都係什錦餃子加麵最抵，所以男朋友就嗌左個什錦米，見到佢話個牛腩係招牌，所以加左十蚊試埋佢。牛腩好腍，但咸左小小。至於什錦係邊八隻餃我就唔知啦，因為男朋友食完冇同我講🤣但我淨係知一定有一隻係青椒，食到佢叫救命。而我自己就嗌左個白菜同韭菜雙拼淨餃。老實說，真係好咸，咸到我真係分唔到我係食緊白菜定韭菜，因為佢嘅咸已經掩蓋晒我所有味覺。但佢啲餃子真係好大隻，我食左六隻已經食唔落。另外我好鐘意食炸鯪魚波，見佢呢度有當然要叫嚟試下，一上嚟好大粒，20秒後就縮晒水。因為佢中間唔係實心，所以其實唔係好大份架咋。佢呢度唔係跟蚧蜆俾你點，而係泰式辣醬，但好彩佢唔係，因為佢本身都已經好咸。另外我仲嗌左豆漿，豆漿就得個甜字，冇豆味。所以如果你對食要求唔高，但要飽肚，呢度絕對滿足到你。