Chef's Stage Kitchen (已搬遷) 新店位置

今日黎到新搬遷嘅Chef’s Stage Kitchen食西式午餐，環境幽暗乾爽，富有情調，而且店員服務周到又有禮貌，未食已經加咗唔少分~前菜有餐湯、沙律、牛角包。南瓜湯濃郁，仲要係熱騰騰嘅。沙律新鮮，好中意加埋青蘋果條。牛角包微微烘烤過，更為鬆軟。美國西冷牛扒配忌廉薯蓉及法式邊豆($138)，伴碟簡潔，但係一啲都唔可以睇少食物嘅質素。牛扒外面少少烤香，入面熟度拿捏得合當，入口鮮嫰多汁，而薯蓉香滑綿密，第一次食法式邊豆，估唔到非常爽脆。卡邦尼尖通粉($88)，濃濃嘅芝士味撲鼻而來，通粉唔會煮得太軟熟，有口感，配上咸咸地嘅煙肉將味道升華。餐飲方面，叫咗summer drink蕃石榴、薄荷、接骨木花(+$38)，蕃石榴味非常重，帶有陣陣薄荷香，飲完成個人感覺好清香~最後加碼叫咗一份tiramisu($58)，估唔到有2人分量咁大，咖啡味濃烈，入口即溶，好creamy。