阿元來了 (鴻圖道) (裝修中)

以前喺觀塘返工，間中都會去阿元來了食 lunch，呢度個入口好隱蔽，好簡陋。不過一入到去，即刻別有洞天，成間店裝修好靚，充滿濃厚嘅台風。先嚟碗台南擔仔麵，再加碗福州魚丸湯，擔仔麵魯肉肥美，貢丸，蝦同滷蛋就正常水準，其他芽菜，蔥同芫茜樣樣齊全，不過湯底略嫌淡咗少少；個湯情況一樣，魚丸大大粒彈牙味濃有油脂，不過湯底都係淡咗啲。小食方面，我最鍾意甘梅粉雞排，炸得香脆之餘又唔會太油，肉質亦唔太乾，蘸埋酸酸哋嘅甘梅粉一齊食，好正。豪華海鮮煎即係蚵仔煎個 friend，口感一樣，餡料就有蚵仔，蝦仁同帶子，不過個人覺得蚵仔煎好食啲，因為蝦仁同帶子嘅味道較淡，冇蚵仔咁突出。至炸甜不辣拼盤有兩款，淺色較腍嘅係平時食開嗰種，深色煙韌啲嘅比較少見，兩種味道差唔多，唔錯。