良順興

營業中

休息中

大角咀餐廳一向都多，好多時都會有選擇困難症唔知食咩好，但如果想食麵嘅話，除左同區嘅刀削麵外，依間良順興都係我成日幫襯嘅餐廳之一。食嘅野其實都係偏港式，中午有套餐，除左小菜類之外亦會有炒粉麵飯，而夜晚主要都係叫餸食飯，見口水雞、酸菜魚依啲都係比較多人叫嘅菜式。不過我每次嚟到叫嘅都係湯粉麵，麵可以搭配兩款餸，而令我成日食嘅原因就係因為佢嘅麵可以揀川皮。平時比較少機會見到，係好似寬粉咁嘅麵。當然除左川皮之外亦可以揀公仔麵/烏冬/米粉，而湯底就可以揀麻椒/雙酸/雞湯。雖然自己平時唔係好食得辣，但覺得麻椒會比較惹味，所以通常都會叫依款湯底然後叫少辣。至於兩款餸就揀左雞排拼墨丸，之前食過豬排，覺得稍微乾左少少，雞排會比較好食。同埋餸嘅分量都頗多，非常足料。川皮闊身，掛湯力唔錯，而且覺得食落口感都有少少似薯粉咁煙韌，唔會過淋，個人覺得幾滿意。加上佢嘅湯底唔會過辣，連我依個唔太食得辣嘅人都尚算handle到，湯底味道濃郁，同粉麵都好夾。食過一次之後就覺得幾啱口味，有時諗唔到食咩都會過嚟食，算係中午飯堂之一。