好運泰國美食

營業中

休息中

喺新蒲崗想食平靚正泰國菜？今日誤打誤撞試咗間喺新蒲崗廣場裏面嘅好運泰國美食，可以入考慮之列。而且雖然佢地點唔起眼，但係當日晚市去都叫做有啲人氣，而且外賣單不斷，算受街坊歡迎。頭盤泰式炸蝦餅炸得香脆，蝦膠打得夠彈牙，平面切開仲見到一粒粒蝦，點泰式辣醬更加醒胃。另外餐廳都有提供串燒，我哋叫咗三串雞肉串燒，雞肉嫩滑又烤得香口，蘸沙嗲醬好惹味。菠蘿海鮮炒飯用個菠蘿換裝住，炒飯裏面有提子乾、魷魚、大蝦、肉鬆、粟米、青豆等配料豐富，味道酸甜開胃，但唯獨是係冇咗主角菠蘿，唔肯定係落漏咗定係本身冇。 馬拉盞椰菜苗，菜苗好有咬口但係無渣，馬拉盞嘅鹹香非常惹味，啱我口味！ 我哋最後仲叫咗個甜品。泰國菜嘅甜品當然唔少得就係芒果糯米飯，芒果新鮮香甜，糯米飯食落仲係暖笠笠，加少少椰汁食，完美作結！ 整體而言，呢間泰菜小店價錢親民，味道正宗，絕對值得支持！