たまご園 (荷里活廣場)

營業中

休息中

公仔就鍾情蛋黃哥，食就無蛋不歡，見到呢間蛋黃色裝修，左排疏窿蛋形框圍住卡位，連啲燈罩都半個蛋殼咁款，點會唔愛不釋手吖！重點係咁多蛋落咗肚，食位完都冇胃漲頂住嗰吓好。八爪魚🐙捲同明太子筷子捲係都係用章魚燒嗰種燒汁，八爪魚捲啲八爪魚係雪藏，冇乜鮮味，全靠個蛋汁同調味救番，筷子捲係塊中等厚度嘅蛋餅捲住對竹筷子，中間夾雜咗啲芝士，扯出嚟拔絲咁，鋪面隻太陽蛋蛋黃似近期人氣日本蛋-蘭王蛋嗰種咁橙嘅色，都幾濃蛋味。和牛肉醬意粉唔重牛味，不過加埋溫泉蛋幾好撈汁。明知食梳乎厘即係食空氣，而且價高，不過實在太耐冇食，而呢間個提拉米蘇梳乎厘亦玩咗啲花臣，中間夾左兩片淋淋地嘅Oreo餅，再夾埋啲tiramisu 忌廉就不致太寡。沙律菜都幾多幾新鮮，插咗3塊熱浪薯片。態度方面，侍應係男嘅俾女嘅殷勤，男嘅係都未舉手佢已走埋嚟問你有咩幫到你，女嗰位只係落單已隔住口罩露出厭世眼，劈低張單叫你對對啱唔啱都唔願多逗留，自己最好醒水，唔好打搞佢。